Bilo pernah dunsanak mandanga generasi mudo Minangkabau mambaco Adaik Nan Sabana Adaik? Atau lai ko lah mangarati kaum mudo kini jo esensi sarato filosofi Adaik Nan Sabana Adaik?
Kok kato alam takambang jadi guru, mungkin lai gak acok tadanga di bibie anak mudo. Walau aratinyo mungkin tak pulo tau. Indak dek karano ongok raya, tapi sabab inyo labiah mahia manggoyang-goyangan pinggang di aplikasi *TikTok* jo lagu *remix* nan indak karuan juntrungnyo?
Dunsanak, adaik nan sabana adaik adolah sagalo nan bakaik jo katantuan alam. Misalnyo api mambaka, aie mambasahi, iko adolah salah satu contoh adaik nan sabana adaik. Sagalo hal nan sipaiknyo sunatullah, itulah adaik nan sabana adaik.
Matoari tabik di timur, dan tabanam di barat itu juo sunatullah. Picayo kapado sagalo nan lah diatur dek Nan Satu, itulah adaik nan sabana adaik. Intinyo, adaik nan sabana adaik itu adolah tauhid. Akidah.
Makonyo, sagalo sunatullah nan lah tapumpun dalam Al Quran, manjadi dasar filosofi Adaik Basandi Syarak, Syarak Basandi Kitabullah. Syarak mangato, adaik mamakai. Jikok tak ado dalam syarak, itu bukan adaik. Tak bulieh dipakai.
Namun, di tangah arus globalisasi nan kian mambabi buto, praktik adaik nan sabana adaik di Minangkabau kini alah mangalami disorientasi jo degradasi. Tantu iko sangaik mamprihatinkan. Adat nan sabana adat—sabagai hukum alam nan indak barubah dan manjadi pusako utamo rang Minang—kini banyak nan tingga sabateh pajangan seremonial jo wacana di kadai kopi sajo, tanpa pangamalan nan nyato dalam kahidupan sahari-hari dek anak kamanakan.
Pado bulan November 2023 nan lalu, sajumlah niniak mamak jo cerdik pandai di Padang mangaluahkan kian raminyo alek-alek nagari nan mampagunoan galanggang hiburan malampaui batas syarak jo adaik. Nan jaleh-jaleh mancarabuik sendi-sendi *Adat Basandi Syarak, Syarak Basandi Kitabullah*. Paristiwa iko tajadi karano lunturnyo pangatahuan generasi mudo tantang pituah lamo, di ma banyak anak mudo kito kini indak lai baraja mambaco alam jo mamilah ma nan elok jo ma nan buruak.
Panyabab utamonyo adolah pergeseran pola didik di rumah jo di surau nan kini alah digantikan dek gawai cerdas. Ruang-ruang tampek baropok, pituah-pituah di lapau, jo palajaran di surau alah aniang. Sahinggo mambuek anak mudo tapapar Budaya lua nan babeda jauah jo kearifan lokal Minang. Akibaiknyo, lahia generasi "instan" nan mangaku urang Minang tapi indak mangarati adaik. Hanyo pandai saketek babaso Minang, tapi labieh bangga jo bahaso urang.
Kok indak capek disalamaikkan jo malakukan revitalisasi pangajaran adaik di sakola jo nagari, mako indak tatutuik kemungkinan kearifan lokal iko hanyo tingga namo dalam buku sajarah. Adaik nan sabana adaik musti dibangkik taruih. Indak hanyo diusia jo kebanggaan semu, tapi diimplementasikan dalam laku jo kurenah.
Anak daro memakai suntiang,
Basandiang jo urang mudo;
Kato batingkah dalam rundiang,
Adaik dijago indak binaso.